Портпаролот на хашкиот Трибунал, Магдалена Спалинјска изјави дека судиите кои ја донесоа ослободителната пресуда за Харадинај и неговите соработници, сепак утврдиле дека се извршени злосторства за кои извршителите мора да одговараат.
Таа порача дека постапката за овие злосторства треба да продолжи пред националните судови.
„Важно е да се знае дека судиите утврдија дека се извршени злосторства по трите точки од обвинението, и делумно по една точка. Од вкупниот број на 16 наводни жртви, обвиненијата се утврдени и потврдени за 11 жртви“, им изјави таа на новинарите.
„Трибуналот соработува со судовите и националните законодавства во регионот, кои имаат значајна работа да продолжат во борбата против неказнувањето. Ние соработуваме со националните правосудства и им ги праќаме доказните материјали и материјалите од истрагата за да можат судовите во регионот да продолќат со оваа работа“, рече Спалинјска.