Титулата најнеспособна, сиромашна европска држава и припадна на Хрватска, на која и е потребна помош од останатите држави на ЕУ, пренесе „Фајненшал Тајмс“.
-Хрватска е мала држава, која минатата година влезе во ЕУ, а не е ниту дел од еврозоната. Таа веќе шест години е во рецесија, а за тоа време изгуби речиси 13 проценти од својот БДП. Невработеноста се движи на ниво од околу 17 проценти. Тоа е социјална катастрофа, која не се разликува многу од оние, кои во последните пет години ги зафатија Грција и Шпанија- пишува „ Фајненшал Тајмс“.
Во текстот стои дека во Хрватска исто како и во Грција постои неефикасен јавен сектор, кој очигледно не му служи на јавниот интерес, туку само го прикрива вистинското ниво на невработеност. Медиумот тврди дека овој проблем е зголемен и поради недостаток на приватни компании, кои можат да обезбедат работни места и успешно да се натпреваруваат на пазарот на ЕУ.
Според „Фајненшал Тајмс“,традицијата на вработување во државниот сектор по политичка линија тешко изумира во југоисточна Европа.
-Членството во ЕУ требаше да им помогне на државите од средна и источна Европа, па и на Хрватска која се покажа како особено бавна во користење на средствата кои ЕУ и ги остави на располагање, седум години пред приклучување во Унијата – заклучува „Фајненшал Тајмс“.
Е. Г.