Членството на Хрватска во ЕУ нема да и ги реши сите проблеми, но земјите кои се приклучиле во Унијата пред неа постигнаа голем напредок во економските и социјалните односи и во реформите.
Истото тоа се случува во Хрватска откако таа поднесе барање за влез во ЕУ, изјави синоќа претседателот на Европската комисија Жозе Мануел Баросо за хрватската државна телевизија ХТВ.
– Користа од членството на Хрватска во ЕУ е голема, бидејќи како релативно мала држава таа ќе биде на исто ниво како и другите и ќе учествува во донесувањето одлуки, истакна Баросо.
Хрватска утре официјално ќе стане 28-та членка на ЕУ. Таа ќе биде првата земја која ќе влезе во Унијата по присоединувањето на Бугарија и Романија во 2007 година.