Во ресторанот и базен „Глориус“ над велешко езеро „Младост“ вчера и денеска се одржува 11-от по ред „Вигор Бармен Куп“, најстарото и најголемо коктел натпреварување во земјава, чиј организатор е „Бадел 1862“ од Скопје.
Во категоријата „Класика“ се натпреваруваа 13 пријавени бармени од цела Македонија, а кои ги оценува жири комисија составена од еминентни експерти од Хрватска, како и претставници на „Бадел 1862“ од Загреб. Купот завршува денеска кога ќе бидат доделени и награди на најдобрите бармени од земјава.
Како што појаснува за МИА Андријана Павловска од маркетинг службата на „Бадел 1862“, жирито внимателно ги следат техниките на подготовка на коктелите и ги оценува.
– Освен начинот на подготовка, жирито ги оценува и бојата, вкусот и мирисот на секој коктел, што дополнително го прави натпреварувањето своевиден коктел-предизвик. Актуелен шампион во „класика“ е Даниел Новиќ од Охрид, победник на ланскиот „Вигор Бармен Куп“ што се одржа во кафе-барот „Куба Либре“ од Охрид.
Она што е посебно интересно за публиката е тоа што сите коктели кои ќе се направат за време на натпреварот може да бидат бесплатно дегустирани.
– Оваа година купот доаѓа во ново руво, кое е резултат на ребрендирањето на „Вигор“ вотка. Ова е единаесетто издание на „Вигор Бармен Куп“, кој прерасна во своевидна традиција, чија основна замисла е коктел-културата да се издигне на повисоко ниво и да го заземе вистинското место во Македонија, потенцира Павловска.