Осамениот Џорџ можеби е мртов, но научниците сега веруваат дека тој не бил последната џиновска желка од својот вид на островите Галапагос.
Експертите сметаат дека можат да „воскреснат“ подвид на желката од островот Пинта, благодарение на програмата за вкрстување со 17 други желки, кои имаат сличен генетски материјал со Осамениот Џорџ, кој угина на 24 јуни на архипелагот во близина на брегот на Еквадор и зад себе не остави живи потомци.
Директорот на националниот парк Галапагос Едвин Наула изјави дека постои голема веројатност дека научниците ќе успеат во својот потфат.
– Тоа би било прв пат да се врати вид, кој е прогласен за изумрен, рече тој, но предупреди дека за тоа ќе бидат потребни 100 до 150 години.