Во Музејот на Македонија се изложени најстарите зачувани фудбалски копачки во земјата, кои датираат од 1931 година, а биле сопственост на Ѓорѓи Соколов Клинчаров – Сокол, фудбалер на ФК „Слога“ од Велес.
Музејот денеска преку својата официјална фејсбук-страница објави фотографии од копачките, дел од музејската поставка, кои Соколов ги користел во периодот од 1931 до 1935 година додека настапувал за ФК „Слога“.
Копачките, чие тежат 700 грама и се изработени од црна кожа, а на долниот дел имаат цврст ѓон врз кој се поставени седум крампони. Од горната страна имаат по едно ремче кое служи за поефикасно да ја држи ногата во копачката.
По крајот на Првата светска војна во македонските градови престојувале англиски единици. Во тој период биле одиграни три натпревари помеѓу македонската фудбалска екипа „Напредак“ и членови на англиските единици. Откако тие заминале за Англија, во знак на благодарност испратиле 11 пара копачки за фудбалерите на скопски „Напредак“.