Повеќе од 1.200 матуранти по седми пат утре на градскиот плоштад „Македонија“ ќе го заиграат танцот квадрил во рамки на „Матурската парада 2013“. Новината е што годинава матурантите ќе играат салса и англиски валцер. Покрај скопските матуранти од 19 училишта, ќе танцуваат и матурантите од Куманово, Струмица, Гевгелија, Охрид и Струга.
Организатори на манифестациајта се Дирекцијата за култура и уметност-Скопје и Танцовиот клуб „Ритам плус“ од Скопје. Покровители се Град Скопје и Агенцијата за млади и спорт, а поддржувач е Делегацијата на ЕУ во Македонија. Медиумски покровител и партнер е Македонското радио-Радио Скопје, кое ќе го преземе радио сигналот од Словенија. Медиумски партнер е и Радио МОФ, кое ќе врши интернет видео пренос од „Матурската парада“.
Предвидено е „Матурската парада“ да ја отворат скопскиот градоначалник Коце Трајановски, евроамбасадорот Аиво Орав и претставник од Агенцијата за млади и спорт.
Никола Глигоров од Дирекцијата за култура и уметност-Скопје на денешната прес-конференција информира дека подготовките за парадата почнале лани, а поинтензивно од второто полугодие на учебната година. Од февруари инструкторите од „Ритам плус“ биле во средните училишта и ги подготвувале матурантите за танцот.
Тој рече дека собирањето и подготовките со матурантите ќе почне утре, во 09 часот. Официјалниот дел на програмата ќе почне во 11:30 часот на плоштадот „Македонија“ во Скопје. Пред одигрувањето на танцот, пред 11 часот матурантите ќе имаат дефиле низ ценатрот на Скопје, од градскиот плоштад, ќе се движат по кејот „13 Ноември“, пред хотелот „Холидеј Ин“, паркот Жена-борец и ќе поминат низ портата „Македонија“. Потоа ќе пристигнат на градскиот плоштад, каде ќе се одвива официјалниот дел од програмата.
Глигоров додаде дека покрај главната цел, дружењето, танцувањето на младите и вежбањето на квадрилот, оваа манифестација има и натпреварувачки момент, да се постави Гинисов рекорд во категоријата истовремено синхронизирано одигрување на еден ист танц на различни места или во различни градови. Исто така, како што рече, важна е и изјавата на матурантите за ненасилство.
Организаторите имаат идеја со матурантите на градскиот плоштад да излезат и матурантите од 1963 година, кои одбележуваат 50 години од својата матура.
Годинава девојките ќе носат жолти маички, а момчињата темно сини со натписот „Матурска парада 2013“.