Владата и Сојузот на средношколци изнајдoa заедничко решение со кое секој матурант ќе може да се запише на било кој факултет во државата или надвор.
„Нужно беше државната матура да претрпи измени и да се најде заедничко решение. Се договоривме за два екстерни испити, додека за третиот екстерен испит се договоривме да се претвори во интерен испит“, рече премиерот Зоран Заев по средбата со средношколците.
Тој рече дека решението го договориле следејќи го примерот од останатите европски држави.
Подоцна Сојузот на средношколци преку соопштение ја извести јавноста дека сепак ќе има два интерни испити и дека на прес конференцијата дошло до забуна.
„Сегашниот модел се состои од три екстерни и еден интерен. Едно од нашите барања, покрај другите девет, беше третиот екстерен предмет да се симне на ниво на интерен. Значи, да се полагаат два екстерни и два интерни предмети. Поените за интерните ќе се добиваат врз основа на просек и оценката од испитот“, појаснуваат од Сојузот на средношколци.
Матурата оваа година наместо на 29 мај, ќе започне на 5 јуни.