Додека повеќето луѓе во светот, во време на пандемија, ограничено движење и намален физички контакт, поголем дел од своето време поминуваат гледајќи телевизија или занимавајќи се со некое хоби, Естонците масовно прифатија капење во ледена вода за да одржат здрав дух.
Околу 500 капачи вчера влегоа во ледените води на Балтичко Море на пристаништето во главниот град Талин и секој од нив пливаше делница од околу 25 метри, објави лондонскиот весник „Гардијан“.
Пливачите беа од сите возрасти – најмалото, деветгодишно дете, а најстариот учесник има 83 години.
– Бројот на зимски пливачи тројно се зголеми во Естонија. Капењето во ледена вода стана навистина популарно меѓу Естонците, рече Ајвар Тугедам, организатор на пливачкиот настан во пристаништето Талин.