Организацискиот одбор на кривопаланечкиот рок-фестивал „Џојфест“ најави одлична програма со домашни изведувачи на годинашното шесто издание закажано за 19 август.
– Шеттото издание на „Џојфест“ во сабота ќе им понуди на посетителите атмосфера за паметење со Игор Џамбазов и „Гуру Харе“, извонредната Тамара Тодевска, како и „The black vice&Social club“ и Ки. И годинава, според досегашната пракса, очекуваме голем број посетители, гости од соседните градови, од цела Македонија, љубители на добриот звук и музика, како и од соседни Република Бугарија и Србија, изјави Александар Михајловски, уметнички директор на фестивалот.
Според него, фестивалот расте низ годините, а со тоа растат и заинтересираноста и апетитите на публиката. Програмата треба да започне во 20 часот на фестивалската сцена на плоштадот „Карпошово востание“, а како предгрупа ќе настапи младиот рок-состав од Крива Паланка, „Дупло-дно“.
Досега, во петте изминати години на фестивалот имаат настапено: „Ареа“, „Ван Гог“, Ален Исламович, Бајага и инструктори, Нокаут, Супер хикс, Бени и Нон -стоп, Иван Раденов, Некст Тајм, Партали, Машина, РГБ…
„Џојфест“ се организира под покровителство на општина Крива Паланка.