Раководството на ЈСП започна да ја спроведува одлуката на Советот на Скопје за воведување на двојазичност во автобусите, што беше усвоена пред две недели.
На македонски и албански се корегираат обичните табли на постојките од кои патниците добиваат информации и електронските дисплеи во автобусите.
Одлуката за воведување на двојазичност во автобусите е според Законот за употреба на јазиците, усвоен во 2008 година, како дел од Охридскиот рамковен договор.
Граѓанското здружение „Разбуди се“ пред усвојувањето најави тужба до ЈСП, барајќи санкции поради кршење на одредбите.
Освен двата јазика, на надворешните табли на постојките ќе биде застапен и англискиот јазик. Но, не и на електронските дисплеи внатре во автобусите, бидејќи немало простор.
„Спроведувањето на двојазичноста во ЈСП нема да чини повеќе од 2.000 евра. Нема потреба од вработување работник за таа цел, бидејќи лицето што ги спроведува одлуките и организира состаноци на Управниот одбор ќе ја врши и работата на преведувач“, изјави директорот на ЈСП, Мишо Николов.