Премиерот Зоран Заев на својот фејсбук-профил вечерва соопшти дека американскиот претседател Доналд Трамп му упатил порака дека го цени и целосно го поддржува Договорот од Преспа.
Претседателот на Владата објави фотографија со претседателот на САД, Доналд Трамп, и нивните сопруги, Зорица Заева и Меланија Трамп, од приемот што американскиот претседател го органиизраше за лидерите на земјите што учествуваат на 74-тото Генералното собрание на Обединетите нации во Њујорк.
– Чест и задоволство ни беше со Зорица да присуствуваме на приемот организиран од претседателот Трамп и првата дама Меланија, во Њујорк, за време на Генералното собрание на ОН. Претседателот ни упати порака дека го цени и целосно го поддржува Договорот од Преспа. Чест е да се добие ваква поддршка од врвен лидер и креатор на глобални договори, напиша Заев на Фејсбук.
Премиерот денеска имаше средба и со генералниот секретар на Обединетите нации Антонио Гутереш.