Се што постои како капацитет, ресурс и памет ќе биде ставено на располагање на граѓаните на Македонија, вклучително на граѓаните на Пробиштип. Владата има смисла од постоење само заради вас граѓаните. Новата општина на чело со Драган Атанасов – Ладич ќе има смисла на постоење само заради вас, граѓаните, рече лидерот на СДСМ, Зоран Заев на вечерашниот митинг на СДСМ и коалицијата во Пробиштип.
– И за законот за стечајците и за законот за рударите, целиот овој период соработувавме заедно со сегашниот кандидат и идниот градоначалник на Пробиштип на кој што сум му благодарен, заради тоа што веруваше. Законот за стечајните работници го донесовме, почна подготовката за законот за рударите заради тоа што тоа е навистина важно овде за Пробиштип, рече Заев.
Тој додаде дека најголема болка и горчина е празнењето на Македонија од младите луѓе и нивното заминување и рече дека мора да се направи нешто за младите да останат во Македонија.
– Затоа, сите млади луѓе што се овде, да се разбереме, државата преку новата влада отвори веќе неколку механизми. Ја воведовме младинската гаранција. Целта е секој млад човек што сака да оди на магистратура и докторат, државата директно ќе му помогне финансиски. Секој друг млад човек, кој што бара работа, а е невработен, завршил образование може да побара работа насекаде, било каде во приватниот сектор, а притоа газдата или директорот да не мора за првата година да му обезбеди плата. Државата обезбедува бруто плата за првата година, за секој млад човек да тргне на работа, рече Заев.
