Сакам да ја информирам јавноста околу постапувањата во Управата за безбедност и контраразузнавање и Министерството за внатрешни работи од страна на Специјалното јавно обвинителство, бидејќи кружат многу шпекулации, затоа сакам да ги дадам релевантните факти врз основа на кои јавноста ќе биде запознаена и тоа ми е обврска, рече министерот за внатрешни работи, Оливер Спасовски.
– СЈО има две судски наредби, една за одземање документација и уште една за одземање на електронски податоци од системот за прислушување за обезбедување на докази во одредена кривично-правна постапка. Директорот на УБК вчера првично одби да ги прими обвинителите, а веднаш по влезот се пристапи кон обезбедување на доказите од едната наредба, додека за втората се бараат технички можности со цел до крај да се реализираат, рече Спасовски.
Тој уверува дека наредбите мора да се извршат поради тоа што така наведува законот.
– Никој не може да биде над законот, Уставот и над судовите, СЈО мора да си ја заврши својата работа. Ова обвинителство мора да ги расчисти состојбите околу нелегалното прислушување, тоа е од интерес на граѓаните на Македонија и на државата, нагласи Спасовски.