Новинарскиот пленум денеска со протест пред Владата изрази поддршка за нападнатиот новинар Саше Ивановски Политико.
Новинарите од Пленумот се револтирани и згрозени од постапката на вицепремиерот за економски прашања, Владимир Пешевски, кој вчера на улица во центарот на Скопје, физички го нападна Ивановски откако тој му постави прашање.
– Поскандалозно од нападот е соопштението на ВМРО-ДПМНЕ со кое се охрабруваат насилниците бидејќи во него се укажува дека „Саше го заслужил нападот“. Соопштението ги охрабрува другите физички да го нападнат тој што не е нивни истомисленик или поставува незгодно прашање, рече Ида Протугер.
Новинарски пленум побараа оставка од Пешевски што е нешто што најмалку може да го направи, бидејќи во спротивно, ќе се сфати дека премиерот кој е и прв човек на партијата ВМРО-ДПМНЕ ги охрабрува насилниците и пресметките со неистомислениците.
Досега, според пленумот, од партијата употребуваа софистицирана агресија преку нивни медиуми, тужби на новинари, но со овој случај постапките ескалираа.
Новинарски пленум потсети дека премиерот Груевски и во една од „бомбите“ охрабрува таков вид однесување кога нарачува „два-три шамари“, притоа наведувајќи дека тоа не е кривично туку прекршочно дело.