Нерези е место на стари скопјани, карпошани и тука мора да има подобар и поубав живот за сите, нагласи Стефан Богоев, кандидат на СДСМ и коалицијата за градоначалник на општина Карпош на средбите со граѓани во Нерези.
– Во 21 век граѓаните се соочуваат со елементарни проблеми. Немаат вода за пиење, канализација, осветлување, нема безбедни улици, рече Богоев.
Покрај основните инфраструктурни решенија, Богоев напомена дека Нерези ќе добие и детско игралиште, како и Културно – едукативен центар сместен во просториите на урбаната заедница на Нерези.
– Нерези е типичен пример како треба да функционира мултиетничка средина на локално ниво. Без разлика на верска или национална припадност граѓаните сакаат да продолжат да живеат заедно, без поделби и етикети.
Тој додаде дека бидејќи сите имаме исти проблеми, сите сакаме локален економски развој и младите да ги задржиме во својата земја.
– Ветувам дека ќе креираме политики кои обединуваат, овозможуваат развој на мултикултаризмот во Карпош и Скопје и намалување на младинската невработеност преку поддршка на бизнис идеи и отворање на старт ап центри, рече Богоев.
Тој кажа дека се предвидени и едномесечни средби со граѓаните и дека за голем број од проектите ќе црпат решенија од граѓаните.