Царинската управа синоќа спречи обид за криумчарење на 13 килограми марихуана на излез од граничниот премин Табановце, соопшти денеска директорот на Царинската управа, Ванчо Каргов.
Марихуаната била пренесувана од страна на државјани на Албанија со возило Тојота Рав 4 со албански регистарски таблички.
– Дрогата е откриена на начин што претходно врз основа на селекција на членови на специјалните единици на Царинската управа и употреба на царинско куче е детектирано дека се работи за случај за шверцување на одредена наркотичка дрога, изјави Каргов.
При деталниот преглед, во пределот на резервната гума, задните врати, и други шуплини во џипот биле најдени поголем број на пакување со марихуана.
Патот на марихуаната, од Албанија, требало да се одвива преку Косово и Србија, но поради режимот на поминување меѓу овие земји тие се вратиле назад и преку граничниот премин Блаце и Табановце требала да излезе од Македонија со крајна дестинација Будимпешта, Унгарија.
Против сторителите, Царинската управа ќе поднесена кривична пријава за сторено кривично дело „Неовластено производство и пуштање во промет на наркотични дроги, психотропни супстанции и прекурсори“, до надлежното Јавно обвинителство.
Цената на запленетата марихуана на западноевропскиот пазар се проценува на 30.000 евра, додека во малопродажба достигнува и до 60.000 евра.
Од почетокот на годинава, македонските цариници спречиле 14 обиди за шверц на марихунала и притоа заплениле околу 530 килограми од оваа дрога.