Германија предлага одвојување на Северна Македонија и Албанија во процесот на европска интеграција, како обид да се постигне компромис меѓу сите земји-членки на ЕУ на 15. октомври, кога ќе се носи одлука за датум за почеток на преговори за членство на овие земји, пренесува „Ројтерс“.
Агенцијата наведува дека се можни две опции, едната е да се постават дополнителни услови пред почетокот на преговорите, а другата е да се одвојат Северна Македонија и Албанија.
Врз основа на планот, предложен оваа недела на министрите на 28. земји-членки на ЕУ кои кон средината на октомври треба да разговаараат за прашањето за доделување датум за преговори за Северна Македонија и Албанија, можен е компромис помеѓу оние што се обидуваат да го приближат Балканот кон Унијата и оние кои се спротивставуваат на тоа, како што се Франција, Холандија и Данска.
„Ројтерс“ потсетува дека Германија пред две недели гласаше за почеток на преговорите меѓу ЕУ и Северна Македонија и Албанија, но со дополнителни услови за Тирана.
Во нацрт заклучоците на Советот на министрите се сугерира Северна Македонија да ги започне преговорите до крајот на годинава, но не и Албанија.
Во нив се вели дека „со оглед на постигнатиот напредок, ЕУ одлучува да ги отвори пристапните преговори со Северна Македонија“, додавајќи дека првата меѓувладина конференција ќе се одржи до крајот на 2019 година.
„Ројтерс“ додава дека иако во нацрт-заклучокот истата реченица ја имало и за Албанија, таа е сепак отстранета од последната верзија каде не се предвидува дата за прва меѓувладина конференција со Тирана.
Наместо тоа, се набројуваат неколку услови од областа на судството и борбата против корупцијата што Албанија треба да ги исполни.
Еден дипломат за „Ројтерс“ изјавил дека усвојувањето на овие заклучоци ќе зависи од Франција, за што лично треба да одлучи францускиот претседател, Емануел Макрон.
Во текстот се потенцира дека Холандија, како земја со големи резерви за проширување, повеќе е наклонета кон Северна Македонија отколку кон Албанија кога е во прашање датумот за пристапни преговори.
Иако се очекува одлуката да биде донесена во Луксембург на 15. октомври, не е исклучено прашањето да биде преместено на ниво на самитот на шефови на држави и влади, каде германската канцеларка Ангела Меркел и Емануел Макрон ќе се обидат да постигнат компромис.