Обвинителката од СЈО, Ленче Ристоска по напуштањето на прес конференцијата од неколку медиуми како знак на револт поради како што наведоа притисокот од СЈО, објасни дека за нив се сите еднакви и доколку некој сторил кривично дело треба да одговара.
Ниеден медиум не е под истрага во СЈО, но доколку одредени лица кои се сопственици или се поврзани со некој медиум, сториле кривични дела кои се сами за себе кривични дела, тогаш треба да одговараат. Во интерес на сите е да се спроведе истрага и да се утврди дали има вина. Ги демантираме сите тврдења дека ние правиме притисок врз медиумите, рече Ристоска.
Во однос на покренатите нови истраги за четири дела, таа кажа дека помошникот министер во предметот „Триста“, е претходно опфатен и во друга истрага на СЈО. Во „Тифани“, најголем дел од прислушуваните материјали до сега не се објавени.
Изворот на приходите во „Тифани“ и „Тотал“ е опфатен со истрагата, но во овој момент нема да ги коментираме приходите на фирмите. Предмет на ова истрага е даночно затајување, што значи одбегнување плаќање на даночни обврски кон државата, рече Ристоска.