Градоначалникот на општина Кавадарци Александар Панов денеска им ги врачи решенијата за вработување на неопределено време на 18 наставници од Кавадарци кои досега работеле на определено време.
– Станува збор за млади кадри за кои ова значи економска сигурност. Тие ќе можат да ги развиваат своите семејства и да раѓаат деца. Добронамерно апелирам до повозрасните наставници и професори кои исполнуваат услови за пензија да бидат солидарни и да не поднесуваат барања за продолжување на нивниот работен век, бидејќи многу кадри чекаат за вработување, а вработувањето е едно од најважните прашања во животот, рече Панов.
Атанас Шиков, советник за образование на Панов и овластен просветен инспектор, кажа дека последните 3,5 години од времено во неопределено вработување преминале околу 152 наставници во Кавадарци со што во четири училишта се целосно сменети наставниците.
– Настана една голема промена во структурата на училиштата. Среќен сум поради тоа затоа што младите се наставници со поголем ентузијазам, сакаат да се докажуваат и имаат подобри резултати, особено сега со реформите од типот на компјутер за секое дете, нагласи Шиков.
