Неизвесно е дали утре во велешкиот суд ќе започне судењето за злоупотребите со АКМИС системот во скопскиот кривичен суд. Причина за тоа е што судот не може да го лоцира обвинетиот и суспендиран поранешен претседател на скопска единица, Владимир Панчевски, дознава „А1он“.
Биле направени повеќе обиди на Панчевски да му се врачи поканата за судењето на адресата од обвинителниот предлог и на другите адреси каде што тој има станови, но тоа било безуспешно. Во анкетниот лист тој пријавил 7 стана и една куќа во Скопје.
Панчевски е обвинет дека ја злоупотребил службената положба и овластување. Предметот треба да се води по скратена постапка, а за делото му се заканува затвор до три години.
Судскиот совет неодамна го суспендира Панчевски поради непрофесионално и несовесно извршување на судиската функција, а тој поднесе жалба на ваквата одлука. Обвинителството го товари Панчевски дека рачно местел предмети на подобни судии, додека тој беше на чело на скопскиот суд.
„Обвинетиот како претседател на Основниот кривичен суд, влијаел врз начинот на електронската распределба на предметите, давал наредби и насоки кој предмет кај кој судија да се распредели и со тоа ја злоупотребил службата и ги пречекорил границите на овластувањата“, соопшти скопското Обвинителство.