Местата кои со закон и следуваат на опозицијата во техничката влада да останат празни додека ВМРО-ДПМНЕ не даде глас за владата, бара премиерот Димитар Ковачевски. Тој повика идниот мандатар, Талат Џафери да направи влада во која министерските и дополнителните заменички министерски места да бидат празни, а кога ВМРО-ДПМНЕ ќе одлучи да ја поддржи техничката влада, тогаш да се вметнат и нивните министри.
„Кога се учествува во влада, тоа значи дека таа влада треба да се поддржи. Во светот не постои пример политичка партија која има учество во влада, да не гласа за владата. ВМРО-ДПМНЕ согласно закон треба да ги даде своите кандидати и да гласа за таа влада. Доколку ВМРО-ДПМНЕ не гласа за таа влада, тогаш тие места треба да бидат празни, мандатарот да предложи влада во која тие места ќе бидат испразнети и во моментот кога ВМРО-ДПМНЕ ќе реши да ја поддржи владата, тогаш наредниот ден ќе може мандатарот да предложи да се изгласаат министрите кои што им следуваат“, рече Ковачевски.
Министрите од ВМРО-ДПМНЕ, според премиерот, мора да присуствуваат на седниците на владата, наспроти тврдењето на опозицискиот лидер Христијан Мицкоски дека неговите министри во техничката влада нема да присуствуваат на владини седници.