Започнува намалувањето на цените за роаминг со земјите од ЕУ. Граѓаните и бизнисите во Македонијa, ќе плаќаат во просек една третина помалку од цената којашто сега ја плаќаат.
Ова намалување важи и за граѓаните од дијаспората и Европа, кога ќе претстојуваат во Македонија.
Намалувањето на цените за дата податоци во роаминг, е исполнување на декларацијата за роаминг потпишана на самитот ЕУ- Западен Балкан, што се одржа во декември минатата година, во Тирана. 38-те телекомуникациски оператори во ЕУ и Балкан, лани договорија значително намалување на јазот помеѓу роаминг тарифите и домашните цени меѓу ЕУ и земјите од балканот.
Декларацијата за роаминг меѓу ЕУ и Западен Балкан, официјално стапи во сила и го означи 1 октомври 2023 година како ден на промените.
„ Од овој октомври горната граница на цените за 1 ГБ податоци во роаминг, во рамки на посебните понуди и пакети, во согласност со Декларацијата за роаминг, не би требало да надмине 18 евра, со што меѓународните патувања и комуникацијата ќе ја направи значително поекономична. Додека три оператори од Западен Балкан освен цените во рамки на пакетот, ги намалија дури и редовните цени за дополнителни услуги“, вели генералниот секретар на Советот за регионална соработка, Мајлинда Брегу.
Во денешното соопштение се вели и дека еден од телекомуникациските оператори во Северна Македонија ја намали цената за 1 ГБ во рамки на некои од неговите роаминг пакети во земјите на Европската Унија до 66 проценти. Ценети сега се движат меѓу 3,8 до 4,9 евра за 1 ГБ во рамки на роаминг пакетот на ЕУ за корисници од Северна Македонија, што е значително под договорената горна граница за цената, стои меѓу другото во соопштението.
Оваа Декларација има за цел значително намалување на надоместот за размена на податоци во роаминг меѓу Европската Унија и Западен Балкан. Целта е до 2028 година цената на роаминг меѓу Европската Унија и Западен Балкан да се приближи до домашните цени.