Врховниот суд по вчершаната седница требаше да одлучи дали да им ги прифати жалбите на тројцата осомничени во истрагата „Империја“ на СЈО, бизнисменот Орце Камчев, газдата на „Пелистерка“, Цветан Панделески и бизнис-партнерот на Камчеви, Ненад Јосфовиќ, да излезат од куќен притвор. Според информации на „Макфакс“, одлуката вчера била донесена, но записникот не го потпишале сите петмина судии кои одлучувале. Највисокиот суд се очекува одлуката да ја соопшти в понеделник.
И адвокатите на ексдиректорот на тајната полиција, Сашо Мијалков, за „Макфакс“ потврдија дека подготвуваат жалба до врховните судии, за нивниот клиент да се брани од слобода. Ова следува по начелното правно мислење на Врховниот суд, според кое, СЈО е неовластен тужител за нови истраги и обвиненија по рокот од 18 месеци определни со Законот.
Во истрагата на СЈО под кодно име „Империја“ осомничени се Јордан Камчев, Сашо Мијалков, Ненад Јосифовиќ, Цветан Панделески, Ратка Куноска-Камчева, Христина Камчева-Стојческа, Зорица Арсовска, Лилјана Гајдовска, Владислав Стајковиќ, Тодор Мирчевски, Дејан Јанев, Ванче Мијалчев и Јованче Тасковски за неколку кривични дела.
Според СЈО, лицата се осомничени за злосторничко здружување, оштетување или повластување доверители, злоупотреба на службената положба и овластувањето, измама и перење пари и други приноси од казниво дело.
Со преземање истражни дејствија и со примена на посебни истражни мерки, обезбедени се доволно докази, од кои, според СЈО, произлегло основано сомнение дека во периодот од 2002 до 2013 година осомничените ги сториле кривичните дела што им се ставаат на товар лично и преку правни лица што биле или се во нивна сопственост.
Васко Маглешов