Врховен суд се уште ја изработува одлуката која ја донесе за предметот „Тенк“, а со која и ја потврди четиригодишната затворската казна на ексминистерката за внатрешни работи, Гордана Јанкулоска, велат оттаму за „А1он“. Тие не знаат кога точно ќе биде финализирана и испратена од Кривичниот суд, од каде, потоа, судија за извршување на санкции ќе треба да и испрати упатен акт за во затвор на Јанкулоска.
„Во најкус можен рок ќе биде доставена, одлуката треба да биде формално изработена“, велат од Врховен суд.
Министерството за внатрешни работи и натаму презема оперативни мерки околу живеалиштето на Јанкулоска, нешто што осудената го оцени како опсада на зградата во која живее и вознемирување на нејзините соседи. МВР ќе треба да постапи во моментот кога ќе добие наредба од судот за спроведување на Јанкулоска.
Одлуката на Врховниот суд е донесена пред четири дена, а Јанкулоска одби да ја коментира истата. По гласините дека таа ќе ја напушти државата за да не ја издржи четиригодишната казна, таа за „А1он“ изјави дека е дома, со семејството, дека не и паѓа на памет да бега.
Со реакција на одлуката од судот се јави и бегалецот Никола Груевски кој сега е азилант во Будимпешта, оценувајќи дека премиерот Зоран Заев вршел притисок врз судовите, а потврдената казна за него не е изненадување.
Во одбрана на Јанкулоска застана и лидерот на ВМРО-ДПМНЕ, Христијан Мицкоски, кој оцени дека таа е осудена без докази бидејќи одбрала да не биде слуга на Заев.