Комесарот за проширување на Европската унија, Штефан Филе, синоќа во Брисел со претседателот на Демократска унија за интеграција (ДУИ), Али Ахмети разговарал за претстојниот прогрес-извештај што Европската комисија ќе го издаде за Македонија на 16-ти овој месец, како и за прашањето за името.
Ова денеска за дописникот на МИА од Брисел го потврдија од Комисијата, соопштувајќи дека е редовна пракса на Филе да разговара со политички претставници од земјите кои се наоѓаат во неговото портфолио.
– Филе и Ахмети се немаа сретнато од март овој месец, кога разговараа во Скопје. Главна тема на синоќешната средба беше претстојниот извештај на Комисијата, но и прашањето за името со Грција и други политички случувања во Македонија, потвди за МИА портпаролот на комесарот за проширување, Петер Стано.
Пред синоќешната средба со Филе, Ахмети се сретна и со поранешниот претставник на ЕУ за Косово, Питер Фејт, но и со дипломатите на земјите-членки на Унијата, во рамки на конференција организирана од Центарот за европски политики (ЦЕПС), каде главна порака што ја испрати е дека “Рамковниот договор во Македонија ќе биде цлеосно исполнет, кога албанскиот ќе стане втор официјален јазик на земјата”. Порача и дека патот на Македонија кон ЕУ и НАТО има голема поддршка кај албанската заедница, но дека поради нерешениот спор за името, Македонија не може да напредува поради што е потребно да се најде компромис за ова прашање.
Во рамки на неговата турнеја низ ЕУ, Ахмети продолжува со гостување во Париз, Франција, а потоа и во Хаг, Холандија.
