Еден месец зјае дупката во која загинаа двајца браќа во Чаир, Обвинителството сѐ уште прибира докази

Еден месец откако двајца браќа загинаа во канал за одвод кога врз нив се одрони земја, Основното јавно обвинителство Скопје се уште прибира докази за случајот. Јавен обвинител веднаш излезе на местото на несреќата, но од Обвинителството велат де сѐ уште се работи на случајот.

Следете a1on на Instagram

„Основното јавно обвинителство Скопје прими писмено известување од Министерството за внатрешни работи во врска со овој настан. Притоа, од страна на надлежен јавен обвинител беа издадени повеќе наредби и насоки за прибирање на информации од различни институции заради утврдување на фактичката состојба. По комплетирање на целокупната документација, доколку бидат обезбедени релевантни докази за сторено кривично дело, Министерството за внатрешни работи е задолжено да достави кривична пријава до обвинителството“, велат од Обвинителството за „А1он“.

Еден месец зјае и дупката во Чаир во која загинаа браќата. Не е оградена ниту пак во близина е поставено какво било предупредување. Купишта земја извадена од каналот како и бекатон коцките од паркингот на чие место е ископан каналот, стојат нечепнати.

Следете a1on на Youtube

Општина Чаир, истиот ден кога се случи несреќата, извести дека инвеститорот немал градежна дозвола за ископот и градежните работи биле почнати во сабота, неработен ден.

Од Државниот инспекторат за труд, кои исто како Обвинителството и полицијата увид направија веднаш по несреќата, не одговорија на прашањата од „А1он“ за резултатот од увидот.

На први јуни Обвинителството соопшти дека несреќата се случила откако бил направен ископ на потегот од станбена зграда до улицата Ресенска со цел поставување одводна канализација.

„Четири лица, татко, двајца синови и близок роднина, копајќи во близина на паркинг, ги поместиле плочките бекатон и ископале дупка за поставување на цевките. Во моментот кога во ископот се симнале три лица, се урнала дел од земјата која била околу ископот, при тоа затрупувајќи целосно две лица. Од настанатите повреди браќата, на возраст од 26 и 28 години починале на лице место. Третото лице, нивен роднина кој бил со нив во ровот бил делумно затрупан и се здобил со телесни повреди“, известија пред еден месец од Обвинителството.