Тони хартија, убаво спакувани во кутии, вака коалициската ДУИ влезе во Комисијата за труд и социјална политика за да се бори против законот за бранители предложен од нивниот коалициски партнер ВМРО-ДПМНЕ.
И наместо да се одблокира Законодавниот дом со тоа што ВМРО-ДПМНЕ законот го поднесе во скратена постапка, сега работата дополнително се искомплицира и влезе во деловнички лавиринти.
ВМРО-ДПМНЕ предложи да се да се ограничат дискусиите и репликите за да може да се дојде до епилог.
За ДУИ ваквите барања се диктаторски, а предложениот закон е антиалбански..
„Со ова се прави преседан, диктат, да не речам диктатура. Барањето за ограничување на дискусиите е недемократски потег на една пратеничка група“,рече Неџат Јакупи од ДУИ.
„Целта е да им се затвори устата на говорниците. Зборувај 10 минути, а потоа седни си, бидејќи ние имаме мнозинство и така сме одлучиле“,дополни Арбен Лабеништа.
Пратениците од ВМРО-ДПМНЕ ги отфрлија ваквите обвинувања од ДУИ, и ветија, како и да е законот ќе биде донесен.
„Не сме диктатори како што велите вие. Целта е да се интензивира работата на оваа Комисија. И тоа не е новост. Бидете сигурни дека Законот за бранители ќе биде донесен. Тој ниту е противуставен, ниту антиалбански, затоа што меѓу бранителите имаше припадници на сите националности“, рече Веле Георгиевски.
Дополнителен проблем е што не се преведени сите поднесени амандмани, затоа ДУИ побара прекин на седницата.
„ 15.000 сте ги предале на македонски јазик. Сте се умориле доста со пишување“, рече Беким Фазлиу од ДПА.
Од ВМРО-ДПМНЕ тврдат дека во Деловникот сѐ е јасно, и оти барањето на ДУИ за одложување е лицемерно.
Расправата е одложена. Амандманите ќе се преведуваат, а Комисијата за деловнички и мандатно-имунитетни прашања ќе треба да пресече дали е деловнички ограничувањето на дискусиите.
Фото:Утрински весник