ДУИ демантира дека постигнале договор со ВМРО-ДПМНЕ за двојазичност.Од партијата на Ахмети ги негираат денеска објавените информации дека е усогласена двојазичноста и тоа не преку уставни измени туку со измени на Законот за јазиците. Во Законот би се пропишала поширока употреба на албанскиот јазик и во општините каде Албанците се помалку од 20 отсто.
Според информациите на А1он сепак вистината е некаде на средина, ставовите се пеглаат, но според интересот на одредени групи и се брифираат медиумите.
Притисоците од членството и на двете партии се големи, оние кои се „офајдиле“ од власта тешко ќе се откажат од привилегиите, без разлика на спротивставените ставови и воинствената реторика во изборната кампања токму по прашањето за двојазичноста.
Доколку ја прескокнат оваа стапица, тогаш кај Ахмети и Груевски останува уште еден жежок костен, а тоа е мандатот на СЈО.
ВМРО-ДПМНЕ беше децидно против продолжување на мандатот на СЈО, а ДУИ тврдеше дека СЈО треба непречено да работи до конечно разоткривање на криминалите што произлегуваат од прислушуваните разговори.
Она на што сега цврсто се држат старите коалициски партии е принципот коалиција и владеење на победничките партии.
На Груевски му остануваат уште шест дена да покаже дека обезбедил парламентарно мнозинство од 61 пратеник.
Т.Ц.