Министерката за образование и наука Мила Царовска изјави дека е поднесено барање до Министерството за здравство и до Комисијата за заразни болести, и наставниците да бидат дел во приоритетната група за вакцинирање и таа смета дека нивниот став е позитивен.
– Согласно овој тренд на вклучување на потребен кадар, ќе дојдат и наставниците на ред и тие ќе влезат во групата за вакцинирање. Тоа во наредниот период ќе ни обезбеди полесно и поедноставно функционирање на образовниот систем и секако поголем број на ученици во училиштата доколку имаме вакцинација во текот на летниот период, вели Царовска, коментирајќи зошто наставниците не се најдоа во приоритетната група за вакцинација, во која се вброени вработените во МВР, АРМ, медиуми, судови и обвинителство, возачи на ЈСП, пожарникари, воспитувачки во градинки и вработени на патарини.
Во однос на тоа дали следната година учениците ќе се вратат во училишните клупи, Царовска рече дека по завршувањето на оваа учебна година, согласно епидемиолошката ситуација во државата, ќе се разговара со Комисијата за заразни болести и со министерот за здравство се со цел да се донесат навремени одлуки за наредната учебна година.