Независниот академски синдикат (НАкС) информира дека на средба со министерката за образование и наука Весна Јаневска, која на нивна иницијатива се одржала во петокот во МОН, не биле прифатени голем дел од нивните предлози за подобрување на текстовите на пекетот три закони за високо образование и за наука.
Синдикатот во допис до медиумите денеска информира дека нивните претставници на средбата ги образложиле своите забелешки, ставови и аргументи во однос на предложените законски решенија, „со посебен акцент на прашањата поврзани со почитувањето на принципот на универзитетската автономија, распределбата на надлежностите меѓу независните тела и извршната власт, условите за избор во наставно-научни и научни звања и финансирањето на научноистражувачката дејност, како и финансиската и кадровската автономија на високообразовните и научните установи“.
-И покрај изнесените аргументи и укажувања, НАкС со жалење констатира дека на средбата не беа прифатени најголем дел од нашите предлози за подобрување на текстот на законите. Претставниците на МОН изразија отвореност само за подобрено дефинирање на релевантните научни бази за научното поле на јазиците и книжевноста. НАкС останува посветен на принципите на академска автономија, заштита на квалитетот и на институционалната одговорност во високото образование и науката и ја реафирмира својата подготвеност за натамошен дијалог со сите релевантни чинители, со цел изнаоѓање решенија што ќе придонесат за одржлив развој на македонскиот систем на високото образование и науката, се наведува во соопштението на Независниот академски синдикат.