Во Прилеп се врши подготовка за масивни минирања во близина на селото Алинци во кое се наоѓа познато наоѓалиште за минерали „Црн Камен“ за потребите на „Бехтел и Енка“ кој ќе го гради автопатот Прилеп-Битола, предупреди од Комитетот за заштита на природното и културно наследство и апелира да се спречи уништувањето на реткиот феномен.
„Веќе е направено едно минирање, а во моментов поголем број тешки машини и друга технологија се ангажирани и се изведуваат ископи дури и преку ноќ. Ако не се реагира итно, ова познато наоѓалиште на минерали ќе биде уништено“, апелира геологот м-р Васја Дамески.
Наоѓалиштето „Црн Камен“ во Алинци се протега на површина од 2 км2 помеѓу селата Алинци и Шелеверци на околу 10 километри јужно од Прилеп. Поврзано е со алкален сиениет кој содржи крупни кристали на микролин, албит, арфедсонит, титанит, аугит, циркон и апатит.
Специфичност на ова наоѓалиште се и ретките минерални парагенези што вклучуваат минерали на ураниум, а тука е пронајден и еден од најголемите кристали на титанит од неколку килограми. Тука е откриен нов минерал кој го носи името на нашата земја „Македонит“, објаснуваат во апелот од Комитетот.
„Наоѓалиштето Црн Камен е геолошки музеј под отворено него. Тоа е многу значајно, не само од геолошки, туку и од економски аспект бидејќи содржи уникатни и високо вреднувани минерали, наоѓалиштето е добро познато во научните кругови и често посетувано од геолози од земјава и странство.