Шефицата во оставка, Катица Јанева, побарала од вработените во ИТ-секторот на СЈО да спроведат т.н. „форензичко бришење“ на сите компјутери во Обвинителството, објави „360 степени“. Според нивните информации, Јанева издала усна наредба, а вработените ги направиле првите подготовки пред да се спроведе бришењето на податоците. Во текстот се додава дека ова бришење нема да ги загрози документите кои ги има во системот на СЈО, но ќе бидат избришани сите податоци за тоа во кое време, кое лица и што било работено.
„А1он“ се обиде да стапи во контакт со Катица Јанева, но таа не одговара на повиците. Дел од обвинителите на СЈО со кои исконтактиравме не знаат за оваа наредба на Јанева и велат дека прочитале од медиумите.
Наредбата на Јанева за бришење на датотеките од компјутерите на СЈО доаѓа во период кога Основното јавно обвинителство води истрага за случајот „Рекет“, каде осомничени се Боки 13 и Зоки Кичеец. За прибирање докази во овој случај, Русковска побара да и се одземат телефоните на Катица Јанева. Според ОЈО, Боки 13 го користел влијанието врз Катица Јанева за да олесни положба на осомничени во постапката „Империја“ која ја води СЈО.