ВИДЕО: Заев во Делчево на почетокот на градежните работи за изградба на современ градски пазар

Од:

Во присуство на премиерот на РСМ, Зоран Заев, вицепремиерот Љупчо Николовски, директорот на Агенцијата за финансиска поддршка на земјоделството и руралниот развој, Никица Бачовски, како и претставници од институции и граѓани, денеска во Делчево беше означен почетокот на изградбата на современиот градски пазар кој е капитален проект за Делчево и за целиот регион.

Во обраќањето премиерот Заев истакна дека изградбата на современиот градски пазар ќе биде уште едно место двигател на локалната економија во Општина Делчево и додаде дека развиени општини значат силна економија.

-Во таа насока, Владата континуирано се залага за рамномерен регионален развој и јакнење на инфраструктурата на општинско ниво. Ја зајакнуваме децентрализацијата и овозможуваме максимално можен трансфер на надлежности од централно на локално ниво. За таа цел започнавме реформа за унапредување на фискалната децентрализација преку реализирање на три главни столба и тоа раст на приходите на општините, отплата на долговите, како и домаќинско, транспарентно и отчетно работење. Владата со буџетски средства и со поддршка на меѓународните финансиски институции спроведува проекти, конкретно насочени кон развој на општините. Главната цел е зајакнување на инфраструктурата и подобрување на условите за живот на локално ниво, истакна Заев.

Градоначалникот на Општина Делчево, Горан Трајковски вели дека Градскиот пазар кој е проектиран на површина на градежна парцела од 11.599 м2 и површина за градење од 6.944 м2 е неопходна потреба за Делчево како погранично место и проект кој има регионално значење.

-Целта е да добиеме современ градски пазар во смисла отворен и затворен дел, каде ќе бидат испочитувани сите критериуми за соодветно чување и продавање на храната и на најразновидната стока, како и соодветен паркинг-простор. Дополнително, овој дел на градот добива современ урбан изглед со можност да се создадат атрактивни локации за идни нови градби. Реализацијата на овој проект, како и на сите претходно реализирани капитални инвестиции во Делчево ќе сведочат за генерации и генерации делчевци за одговорното и посветено работење. Многу пати сум истакнал и сега ќе повторам дека Делчево е школски пример како одговорната локална власт и одговорната централна власт, нивната кохезија и следењето на заедничкиот интерес, дава резултати за граѓаните, порача Трајковски.

Вкупната вредност на проектот е околу 33,5 милиони денари, средства обезбедени од владини институции и дел од општинскиот Буџет, а градежните работи во двете фази од изградбата се очекува да завршат за период од една година.

Би можело да ве интересира

Заев: Со новата инвестиција на „Текнопанел“ се отвораат 120 нови работни места со просечна плата над 33.500 денари

А1он

Штипскиот регион еден од најатрактивните за инвестиции

А1он

Изложбата на карикатури на тема Ковид-19 во Делчево

А1он

Директорот на Агенцијата за странски инвестиции Павлески судија на престижните награди „Go Global”

А1он

На „Инвеститорискиот ден“ склучени најголем број трансакции годинава

А1он

Кочанчанец уапсен поради непријавени пари на граничен премин Делчево

А1он