Грчките опозициски партии Нова демократија и ПАСОК ја обвинија Владата дека ја враќа земјата назад, откако министрите за финансии на еврозоната го одобрија пакетот предлози на владејачката коалицијата, по што беше одобрено четиримесечно продолжување на договор за финансирање.
– На крајот, ја сретнавме СИРИЗА на излезот од меморандумот. Ние си заминувавме кога тие брзаа да влезат, рече лидерот на Нова демократија, Андонис Самарас.
Според него, многу од предлозите на Владата се исти како оние што ги изготвила неговата администрација, и кои тогашниот министер за финансии Гикас Хардувелис преку и-меил им ги испратил на претставниците на тројката.
– И-меилот испратен од страна на Варуфакис служи како мост кон нов меморандум, додека Владата на Самарас беше на пат кон излез од меморандумот и да се пресели во превентивна кредитна линија која ќе дозволеше да се позајмува од пазарите, се вели во писмената изјава на Самарас.
Лидерот на ПАСОК, Евангелос Венизелос исто така го критикуваше начинот на кој Владата ги водела преговорите.
– Токму кога бевме подготвени да излеземе од меморандумот и да ја преземеме претпазливата кредитна линија со многу поповолни услови, ние сме заглавени со стариот меморандум со месеци и се подготвуваат за трет меморандум од јули, изјави поранешниот заменик-премиер
Венизелос посочи дека тоа што Владата сама го изготвила списокот со предлози не било предност, туку потег од страна на грчките кредитори со цел да се „казни“ сегашната владејачка коалиција.