Министерот за економија, Крешник Бектеши, појасни дека казината и обложувалниците кои нудат и угостителски услуги, ќе мора да ја почитуваат новата мерка на Владата за работење до 18 часот.
„Не сум информиран колку кладилници и обложувалници внатре во нивните објекти имаат и угостителство, но секако дека тие што имаат во нивен склоп услуги во делот на угостителството ќе треба да ги почитуваат мерките и нема да можат да работат во делот на угостителството“, рече министерот Бектеши.
Владата вчера ги прифати препорачаните мерки од Комисијата за заразни болести, па од овој петок сите угостителски објекти ќе може да работат само до 18 часот, а не до 21 како досега.
Бектеши вели дека и во следната година ќе има поддршка за угостителскиот сектор кој е погоден од мерките против ширење на Ковид-19.