Барање за цена поднеле МЕМО, МЕПСО и Електродистрибуција, но дел од барањата не се целосни бидејќи тендерот за набавка на струја за покривање на загубите на МЕПСО се уште не е реализиран. Регулаторната комисија нема да ги добие пресметките за новата цена на електрична енергија за граѓаните од ЕСМ додека не се завршат тие тендери.
– ЕСМ понудил 57 евра наместо 53 евра за мегават час и наместо обезбедување на 100% од вкупните потрошувачи, ќе се обезбедат 95% за малите домаќинства. Според нашите првични пресметки, доколку се прифатат барањата од сите, зголемувањето на електрична енергија би изнесувало 27%.
Од сега Регулаторна навлегува во анализи на барањата и очекувам дека до крајот на следна недела ќе ги донесеме цените за МЕПСО за пренос, за МЕМО за организирање на пазарот и за Електродистрибуција за дистрибуција на енергијата до потрошувачите. Потоа ЕВН ќе достави цена која треба да биде ја помине контролата во РКЕ и нашата одлука ќе биде обврзувачка за нив.
Ќе бидеме максимално транспарентни и нема да дозволиме граѓаните да почувствуваат ценовен шок благодарение на иновативните решенија кои ќе ги понудиме – истакна претседателот на Регулаторна комисија за енергетика, Марко Бислимоски.
Според него, ќе има зголемени трошоци за набавка на електричната енергија бидејќи ЕВН ќе ги набавува на слободен пазар оние 5% кои нема да му ги испорача домашниот ЕСМ, а цената во моментов е 130-140 евра за мегават час, односно многу повеќе од загарантираните 57 евра за мегават час.