И годинава традиционално во Куманово ќе се одржи Кумановско културно лето, но со видливо намален број на настани. И покрај зголемениот буџет, кој изнесува 12.000.000 денари, Советот одлучил да се намалат случувањата, во однос на претходните години.
Според директорот на Фондацијата за култура и спорт при Општина Куманово, Нино Величковски бројот на настаните е намален, поради малата заинтересираност на граѓаните.
-Пред неколку години во рамките на културно лето имавме 47 програми, што значеше дена секој ден се одржува нешто, но настана проблем бидејќи немавме доволен број на публика. За театарски претстави и музички случување мора да се вложат пари, но без доволен број на публика, сето тоа пропаѓа – изјави Величковски, кој додаде дека доколку има повеќе средства, ќе организираат и поголем број културни настани.
Тој истакна и дека Општина Куманово најмногу е фокусирана на големи проекти, како формирање театарска работнилница, младински хор и тамбурашко училиште, со цел во иднина да се создаде локален подмладок.
Елена Георгиевска