Националната установа Ансамбл за македонски народни игри и песни „Танец“ ќе добие нов дом. На иницијатива на директорот на ансамблот, Мартин Вучиќ, на последната владина седница одржана на 23 јуни, било разгледано и одобрено поднесеното барање на институцијата за ново урбанистичко-архитектонско решение за нов дом.
„Танец“ е една од најстарите културни институции во државата, а на проектот за новите простории се работело интензивно во изминатиот период, велат од раководството.
Владата го разгледала барањето и го задолжила Министерството за култура да ѝ предложи соодветно решение за проблемот со кој се соочува Националната установа Ансамбл за македонски народни игри и песни „Танец“.
„По седум децении постоење, една од најважните македонски институции од областа на културата кај нас ќе добие своја сала и соодветни услови за работа и концертирање, достојни за нејзината историска важност. Ова е прв пат, некоја влада да има слух за значајната улога на адекватните просторни услови во целокупниот раст и натамошен развојот на овој наш најголем амбасадор на македонското фолклорно богатство и македонската култура, воопшто,“ велат од „Танец“.