На седница на Комисијата за транспорт, врски и екологија, денеска повторно ќе се најде Предлог законот за изменување и дополнување на Законот за аудио и аудиовизуелни медиумски услуги.
Дали политичките опоненти СДСМ и ВМРО-ДПМНЕ конечно се договорија и ќе се донесат неопходните измени кои треба, доколку доследно и искрено се применуваат да гарантираат независност на медиумите и достигнување на највисоки професионални стандарди.
До сега, сите декларативно кога се власт се залагаат и велат дека слободни и независни медиуми се демократски вредности, но работат спротивно, а кога се опозиција критикуваат за медиумски мрак. Единствено во овој едно и пол годишен период работите беа оставени да течат по инерција во очекување на нова законска регулатива.
Со предложената измена се очекува да се обезбеди транспарентен, независен, ефикасен и отчетен јавен радиоадифузен сервис и регулаторно тело во областа на аудио и аудиовизулените медиумски услуги.
Со начинот на избор на членовите на Советот и директорот на Агенцијата за аудио и аудиовизуелни медиумски услуги и јавниот радиодифузен сервис се обезбедуваат основните предуслови за професионални персонални решенија, без постоење на судир на интереси и политички влијанија.
Во однос на Македонската радиотелевизија се воспоставуваат солидни законски основи за независна уредувачка политика и одржлив систем на финансирање, односно 0,7% од Буџетот на Република Македонија, секоја година.
Политички плурализам во медиумите и спречувањето на говорот на омраза во медиумите се уредува преку воведување на можноста Советот на Агенцијата да изрече соодветни мерки за сите, непристрасно и независно, кои вршат повреди на законските одредби.
Во законските решенија се интегрираат и забелешките во Извештајот на Прибе во делот за медиумите на тој начин што медиумите се ослободуваат од секаква форма на политички притисок, со целосно дистанцирање од партиски политики, а се овозможува и воспоставување на непристрасен и независен од политички, комерцијални и други влијанија и идеологии јавен национален сервис.
Денеска ќе биде појасно колку навистина се усогласени партиите, но најдобар показател ќе биде спроведувањето на законот и желбата на власта да го демократизира медиумскиот простор.