Македонија и Бугарија денеска во Скопје потпишуваат договор за пријателство со цел да изградат поблиски односи и да ја зајакнат билатералната соработка, најавуваат грчките медиуми.
Премиерот на Македонија, Зоран Заев и неговиот бугарски колега, Бојко Борисов ќе се сретнат денеска во Скопје за да го потпишат „историскиот договор“, јавува „Катимерини“ додавајќи дека двајцата премиери ќе положат венец на споменикот на Гоце Делчев, „за кој двете земји го сметаат нивен национален херој“.
„Во изјава минатата недела, премиерот на Македонија инсистираше на тоа дека договорот за пријателство нема во никој случај да влијае врз интересите на Македонија, додека во говор во Парламентот во Софија, исто минатата недела, бугарскиот премиер истакна дека договорот ќе ја направи Македонија стабилен сојузник со кој Бугарија дели заеднички ЕУ и НАТО вредности“, пишува весникот.
„Катерини“ наведува дека опозициската ВМРО-ДПМНЕ „не се согласува со потпишувањето на договорот“, и оти „за повеќето набљудувачи, пак, договорот е добредојдена иницијатива за зајакнување на односите“.
– Ова е важен чекор кој го отвора патот за една нова ера на добри односи со нашите соседи. Состојбата не е идеална. Ова ќе биде добар прв чекор за идни подобрувања, ја цитира „Катимерини“ изјавата на македонскиот дипломат Љупчо Арсовски.