Екологисти од Кавадарци учеа да градат куќа од еколошки материјали во рамки на меѓународен проект во Србија, беше речено на денешното одбележување седум години од постоењето на еколошкото друштво „Еко-живот” од Кавадарци.
Споделувајќи ги искуствата со останатите членови на регионалниот еколошки центар, член на Движењето на екологистите на Македонија Славица Саздовска зборуваше за значењето на еколошките куќи кои стануваат тренд во светот.
– Правевме куќа од природни материјали како што се слама, трски и кал. Целта беше намалување на органскиот отпад во природата, рече Саздовска.
Освен неа, во изградбата на еко куќата учествуваа и Сара Саздовска и Сузана Плачкова, архитект, која проговори за атрактивната куќа од стручен аспект, задржувајќи се на материјалите и начинот на градба.
Претседателот на „Еко-живот” Роберто Паризов изрази надеждека ќе се зголеми јавната свест за еколошките тематики и затоа, рече, се бираат вакви проекти.
– Го одбележуваме крајот на трите Еразмус програми испланирани за јули. Наши претставници од Кавадарци беа испратени на едукативни тренинзи за размена на искуства и слични програми кои друштвото ги работи повеќе години, истакна Паризов.
Владимир Маневски беше еден од претставниците на проектот за редуцирање, реупотреба и рециклирање на општествените добра, кој се реализираше во Романија.
– Целта од организирање ваков настан е да се запознаат младите со реупотребата на општествените добра, и со начинот на рециклирање, нагласи Маневски.
Александар Тефов, еден од учесниците во проектот „Енергијата на природата”, информираше за активностите во Хрватска и настапот на македонските претставници со изградба на соларен колектор за топла вода.
Паризов го најави и следниот меѓународен еколошки проект на кој ќе учествуваат, а ќе се реализира во Турција. Нагласи дека изминатите години зад нив стојат голем број еколошки акции, семинари, едукации, работилници, учество на општински државни и меѓународни активности, како и соработки со училишта.
– Екологијата е главен двигател за зачувување и подобрување на човековата околина, како и подигнување на јавната свест, додаде Паризов.