Нуклеарниот договор на Иран со светските сили е „вовед во понатамошни дипломатски потфати“ за решавањето на конфликтите на Блискиот исток, изјави денеска во Техеран министерот за надворешни работи на Германија, Франк-Валтер Штајнмаер.
– На овој регион му е потребно повеќе дипломатија, не помалку, изјави Штајнмаер укажувајќи на конфликтите во Сирија, Јемен и Ирак. Наведувајќи дека постојат „многу прашања во врска со намерите на Иран во регионот и многу сомнежи“, Штајнмаер нагласи дека Техеран дури иако ги смета за „нечесни и неосновани…не треба да ги игнорира туку да ги решава конструктивно“.
На заедничка прес конференција, шефот на иранската дипломатија рече дека верува оти „реализмот е зголемен на Запад во поглед на сириската криза и дека постојат решенија за кои сите може да се сложат“.
Зариф истакна дека странското ангажирање во Сирија треба да биде насочено на решавање на кризата, а не на наметнување свои гледишта врз сирискиот народ.