Никола Груевски, Зоран Ставревски, Канческа Милеска, молчат. Никаде ги нема. Да објаснат како за само 6 катни гаражи власта потрошила приближно 80.000.000 евра пари на граѓаните, колку што требаше, според најавите, да чини Скопје 2014, рече Петре Шилегов.
Ќе се кријат, кога ниедна здрава логика не може да го оправда фактот дека за по едно паркинг место ни влечеле до неверојатни 50.000 евра!
Ајде сега да видиме колку ни трошеле за метар квадратен во стиропорните и гипсани барокни објекти. До неверојатни 5 ипол илјади евра за м2!
Еве примери. Објектот на Стар театар е на 7.200 м2. За него се потрошени 39.000.000 евра. Значи м2 `не чини 5.000 евра (5.416 евра)!
Музејот на ВМРО, располага со 5.100 м2.Чини над 20.000.000 евра. Значи метар квадратен во овој објект изнесува 4.000 евра!
За објектот на ЈП Водовод, кој се планира да биде 5.326 метри квадратни, ќе плаќаме по 3.800 евра (3.813 евра) за метар квадратен!
Приближно толку, по 3.700 евра (3.722 евра) за метар квадратен плаќаме за објектот на Филхармонија.
3.100 евра (3.128 евра) по квадрат за Државниот архив.
Во зградата на АЕК еден метар квадратен е неверојатни 3.000 евра (2.949 евра)!
Само за споредба, просечна цена на стан во Скопје, според Државниот завод за статистика, е 900 евра по метар квадратен. Најскапиот станбен простор во Скопје е 1300 евра. Овој просекот на државно ниво е под 750 евра!
Ако се земе предвид и дека градежната цена на становите е 300 – 500 евра за метар квадратен, тогаш навистина, што правела власта со по 3.000, 4.000, 5.000 евра за метар квадратен?!
Се изгубиле во бунарот без дно, се заборавиле во можностите што ги виделе во Скопје 2014.