Американскиот секретар на Военото воздухопловство, Трој Меинк, изјави дека оружјето во орбитата е потребно за заштита на американските сили од непријателски дејствија.
Говорејќи во понеделникот на конференција за воздушни, вселенски и сајбер-способности, Меинк рече дека САД се подготвени за заканите што се развиваат. Сепак, тој не откри детали за способностите на оружјето, ниту кога тоа било поставено во орбитата.
Високи американски воени претставници претходно зборуваа за плановите за унапредување на воените способности во вселената, посочувајќи ги руските и кинеските програми за развој на начини за напад врз американските сателити и попречување на нивното функционирање во иден конфликт.
Администрацијата на американскиот претседател Доналд Трамп соопшти дека вселенските способности, заедно со пресретнувачките ракети, се клучен дел од планираниот одбранбен систем „Golden Dome“, чија цел е заштита на САД од ракети и други воздушни закани.
Со Договорот од 1967 година е забрането поставување оружје за масовно уништување во орбитата. Сепак, големите сили, меѓу кои САД, Русија и Кина, со години развиваат други способности што не се опфатени со договорот, како што се нападите врз сателити на противникот, кои се клучни за воените комуникации, надзорот и навигацијата.
Минатата година Трамп издаде извршна наредба со која се нагласува улогата на американските Вселенски сили не само во одбраната на средствата во вселената, туку и во нивно напаѓање.
Американските Вселенски сили, најновиот род на американската војска, беа формирани во 2019 година со цел заштита на американските средства во вселената, вклучително и стотици сателити што се користат за комуникација и надзор.
„Контролата на вселената ги опфаќа областите на дејствување потребни за спротивставување и контрола на вселенскиот домен, со користење кинетички и некинетички средства за влијание врз способностите на противникот преку попречување, деградација, па дури и уништување, доколку е потребно. Овие способности може да се користат во офанзивни и дефанзивни цели по наредба на борбените команди“, изјави портпарол на Вселенските сили за Би-би-си.
На почетокот на февруари беше објавено дека два руски сателити веројатно пресретнале комуникации на најмалку десетина европски сателити од почетокот на руската инвазија врз Украина во 2022 година.
Таквото пресретнување можело да им овозможи на руските разузнавачки служби да читаат чувствителни податоци што ги пренесуваат сателитите или, хипотетички, дури и да преземат контрола врз нив.
САД во 2024 година соопштија дека Русија лансирала сателит за кој веруваат дека би можел да биде способен да напаѓа други сателити. Москва јавно не се огласи за овие наводи.
Американските Вселенски сили наведуваат дека Кина развива и користи вселенски и противвселенски способности во рамките на стратегијата за воена модернизација, додека Русија ја смета вселената за домен на војување и верува дека вселенската надмоќ ќе биде одлучувачки фактор во идните конфликти.