Легендарниот хрватски боксер Мате Парлов доби споменик во Имотски (Хрватска).
Бронзената статуа висока три и пол метри беше свечено откриена денеска на влезот од градскиот стадион „Госпин долац“, а Парлов е прикажан во својата препознатлива победничка поза.
Автор на споменикот е вајарот Анто Јуркиќ, а проектот беше заеднички реализиран од Хрватската боксерска федерација, Сплитско-далматинската жупанија и градот Имотски.
Локацијата не е избрана случајно. Во непосредна близина на стадионот се наоѓа куќата каде што Парлов го помина дел од своето детство, а од местото каде што е поставена статуата има поглед кон низа значајни локални знаменитости.
Парлов е роден на 16 ноември 1948 година во Сплит, во семејство со потекло од Имотски. Како десетгодишно дете, тој се пресели со семејството во Пула, градот каде што почна да се занимава со бокс и каде што го помина поголемиот дел од својот живот. Почина во Пула во 2008 година.
Парлов се смета за најголемиот хрватски боксер на сите времиња. Во аматерска конкуренција, тој освои олимписко злато во Минхен во 1972 година, титула светски првак во Хавана во 1974 година и европско злато во 1971 и 1973 година.
Откако премина во професионалци, стана европски првак во 1976 година, а две години подоцна ја освои и титулата светски првак во полутешка категорија според верзијата WBC.
Со тоа, тој стана првиот боксер од социјалистичка земја што ја освои професионалната титула светски првак.
Тој е единствениот боксер што ги освои европското, олимпиското и светското аматерско злато, како и европската и светската професионална титула во иста категорија. Прогласен е за најдобар хрватски спортист на 20-тиот век во изборот на Хрватската телевизија.