Масовниот влез на околу 72.000 мигранти во шпанската енклава Сеута на 30 и 31 јули не бил спонтан миграциски бран, туку однапред организирана операција во која учествувале мароканските безбедносни сили, се наведува во извештај на шпанскиот Национален центар за имиграција и граници (CENIF).
Документот, кој бил доставен до Националниот суд, ги анализира случувањата и заклучува дека миграцијата можела да биде само параван за поширока операција, за која, според истражителите, биле задолжени марокански агенти.
Како еден од клучните показатели дека не станувало збор за спонтано движење, шпанските истражители го наведуваат фактот дека дури 90 отсто од луѓето се вратиле во Мароко само неколку часа по влегувањето во Сеута.
Во извештајот се наведува дека мароканските жандарми активно го контролирале движењето на луѓето. Тие, според шпанските истражители, им давале инструкции на мигрантите и насочувале илјадници луѓе собрани во Кастиљехос кон конкретни точки од каде што требало да преминат на шпанска територија.
На снимките, наводно, се забележани и лица во цивилна облека кои им издавале наредби на униформирани марокански полицајци.
Шпанските власти сметаат дека овие детали ја оспоруваат можноста дека станувало збор за изолиран инцидент предизвикан од криминални групи или повици на социјалните мрежи.
Според извештајот, првиот бран започнал на 30 јули, пред 11 часот. Во него главно учествувале млади мажи на возраст меѓу 15 и 25 години, најголем дел од Мароко, кои биле опремени со нуркачки одела, перки и помагала за пловење.
Подоцна, до околу 22 часот, започнале да пристигнуваат цели семејства, меѓу нив жени и деца. За разлика од првата група, тие главно носеле спортска облека и јапанки и немале опрема за пливање. Во овој бран имало и лица од субсахарска Африка.
Во текот на ноќта и наредниот ден повторно бил забележан прилив сличен на првиот бран.
Според CENIF, ваквиот распоред овозможил најпрво да биде преоптоварен шпанскиот систем за контрола на границата кај Ел Тарахал. Кога најподготвените лица создале голем притисок на таа точка, шпанските сили немале доволно капацитет да го контролираат пристигнувањето на останатите групи.
CENIF настанот го оценува како пример за „офанзивна контраразузнавачка операција“, чија цел, според извештајот, била да се тестира и доведе во прашање способноста на шпанските разузнавачки служби, особено Националниот разузнавачки центар (CNI).
Клучното прашање за шпанските истражители е како подготовките за толку голема и координирана операција можеле да останат незабележани до моментот кога започнал масовниот упад.
Во првиот момент, премиерот Педро Санчез масовниот премин на границата го опиша како „напад врз територијалниот интегритет“ на Шпанија.
Тврдењата за улогата на мароканските безбедносни структури произлегуваат од шпанскиот разузнавачки извештај и не значат дека одговорноста на Мароко е правосилно утврдена.