„Севернокорејците се појавуваат на територијата на Руската Федерација од време на време. Го гледаме тоа, го знаеме. Ако на почетокот се зборуваше за стотици, потоа илјадници, сега е донесена одлука да има од 30 до 50 илјади Севернокорејци на територијата на Русија“, рече Зеленски во интервју за телефонскиот маратон „Единствени вести“.
Тој истакна дека севернокорејските војници ја изучуваат војната и стекнуваат искуство во модерното војување, кое Северна Кореја би можела да го искористи во случај на идни кризи и ескалација во Азиско-пацифичкиот регион.
Зеленски потсети дека Русија користела муниција испорачана од Северна Кореја за да ја нападне Украина.
„Северна Кореја ќе стекнува сè повеќе искуство во модерното војување, ќе добива лиценци од Русија, ќе ги добива сите воени инструменти од неа. Јасно го разбираме ова“, нагласи украинскиот претседател, пренесува Интерфакс Украина.
Тој додаде дека во оваа ситуација, Украина очекува да ја зајакне воената соработка со Република Кореја, особено во областа на воздушната одбрана.
„Многу би сакале да добиеме поддршка од Јужна Кореја во она што ни недостасува. Тоа се системи за воздушна одбрана. И ние сме подготвени да соработуваме во областа на „договорот за беспилотни летала“ и така натаму. Постои законско ограничување во нивниот случај во согласност со Уставот. Но, ние би сакале соработка и сметаме на неа, нашите дипломати разговараат“, додаде Зеленски.