Руската Федерална служба за безбедност (ФСБ) објави дека се спречени терористички напади во три руски региони и дека се уапсени три лица под сомнение за планирање терористички напади врз воен персонал, волонтерски организации и објекти за гориво, енергија и транспорт по наредба на украинските разузнавачки агенции.
„Федералната служба за безбедност на Руската Федерација приведе тројца соучесници на украинските специјални служби во Република Адигеја, Тјуменската област и Краснодарската територија“, се вели во соопштението на ФСБ, објавено од Интерфакс.
Според разузнавачката агенција, уапсените планирале да извршат саботажни и терористички акти против припадници на „Вооружените сили на Русија“, волонтерска организација која им обезбедува поддршка на учесниците во специјални воени операции, како и против транспортната инфраструктура и објектите за гориво и енергија во овие региони.
За време на нивното апсење, запленета е импровизирана експлозивна направа направена од пластичен експлозив произведен во странство, како и импровизирани запаливи направи.
