Полските власти добиле предупредување за можни диверзии на границата со Русија, поради што е покрената специјална безбедносна операција во северниот и североисточниот дел на земјата.
Шефот на полската полиција Марек Борон изјави дека минатата недела военото разузнавање и сојузничките служби ги предупредиле властите за можни безбедносни закани. Како едно од можните сценарија се споменува и обид на вооружена група да ја премине границата.
Засега не се објавени детали за содржината на предупредувањето.
Борон за радиото RMF FM изјави дека во седиштето на полската полиција во Варшава е формиран оперативен штаб за координација на акцијата.
Операцијата се спроведува во Војводството Вармија и Мазурија, на северот на Полска, долж границата со руската Калининградска област, како и во соседното Подласко Војводство, кое се наоѓа на североистокот на земјата и се граничи со Литванија и Белорусија.
На терен се испратени полициски службеници од повеќе региони, а во акцијата учествуваат и антитерористички единици, војската, граничната полиција и разузнавачките служби.
„Полицијата го обезбедува подрачјето долж Калининградската област поради можни настани што би можеле да доведат до диверзии“, изјави Борон.
Тој нагласи дека една од главните задачи е заштита на населението и објектите што би можеле да бидат изложени на ризик.
Паралелно со операцијата долж границата, полската полиција издаде наредба нејзините специјализирани единици за одржување на јавниот ред да останат во своите матични бази од 2 до 8 ноември.
Овие единици треба да бидат подготвени за итно распоредување на терен, доколку се појави потреба.
Станува збор за сили што претставуваат централна резерва на главниот командант на полската полиција и можат да бидат испратени во кој било дел од земјата.
Од полицијата појаснија дека мерката е воведена поради заканите од саботажи и диверзии. Самата наредба за зголемена готовност, сепак, не значи дека овие специјални единици веќе се распоредени на границата со Русија.